來源：壹週刊 作者:齊百通 2010-07-15 13:46
骨灰龕生意好搵，人人都想分一杯羹，搞開地產嘅賭王不惜撈過界。
政府上星期公布揀十二塊地新建骨灰龕，諗住大部分起墳場附近，會少阻力，點知一樣有市民拉隊反對，咪話唔頭痕。
香港有排搞，一河之隔澳門就唔同，賭王搞超級骨灰龕，工程如火如荼，預計明年中落成，除澳門居民，香港同珠海居民都係目標顧客，中港澳通殺。
賭王旗下信德集團做開地產、酒店同船務，撈過界梗係錢作怪。信德早在今年四月業務報告入面，已經話會建骨灰龕，提供約五萬個「設計新穎和時尚」龕位，對市場有重大吸引力咁話，估計全部賣出，有九億元進賬，平均每個只賣萬八蚊，比香港平一大截，到時肯定會大炒特炒!