馮檢基籌辦「開心殯儀」

一向搞開社企生意嘅民協馮檢基    又有新諗頭，想開多幾檔生意，其中一樣諗住搞殯儀，不過佢搞嘅同傳統唔同，佢話要搞「開心殯儀」生意，成個過程唔係愁雲慘霧，而係開開心心咁送人離開。呢個諗法似足電影《六樓后座2﹕家屬謝禮》橋段，套戲劇情就係講一班後生仔，諗住搞「開心殯儀」。

生前開始提供服務

不過，阿基已經有成套諗法，當然唔係好似電影咁兒戲。佢話希望由客人生前開始提供服務，例如陪佢揀棺木、搵山墳等，畀當時人選擇自己「死嗰套」。佢又話，過程中，大家都可以有講有笑，同埋畀人做定心理準備，其實死亡唔需要太恐懼咁話。阿基仲提醒，更重要係一早要格晒價，唔使到魂歸天國後，仲要畀人鋸一筆。