來源：太陽報 作者: 2012-02-14 13:49
巴塞隆拿早前曾經宣布會喺魯營興建骨灰龕場，依家細節已經全面落實，球會將會喺魯營旁邊建造一個面積達1,800平方米、供應9萬個靈位嘅巨型龕場，等一眾「地上最強」球迷可以「生為巴塞人，死為巴塞魂」，真係恨死香港球迷!
從 google earth 上看魯營球場。
豪華獨立位管理費3萬
根據早前公布嘅消息，巴塞隆拿本來只係計劃起2萬個龕位，不過最後就決定撥出魯營隔籬一塊面積達1,800平方米嘅土地，興建一個可以裝載9萬個靈位嘅龕場，「容量」直逼魯營球場!據西班牙《體育報》消息指，其中有3萬個係豪華獨立靈位，仲會綴上施華洛世奇水晶，50年嘅管理費盛惠3,000歐元(約3萬港元)，另外6萬個則係收費1,200歐元(約1萬2千港元)嘅公眾靈位，收費平過香港多多聲。
呢個「巴塞骨灰龕場」嘅特別之處，就係牆壁都係用馬賽克砌成嘅巴塞經典照片，唔似一般龕堂咁冷冰冰，等家屬拜祭先人時心情更加平和。預計龕場第一期工程將於今年年底前完成，屆時將供應2萬個獨立靈位加1萬個公眾靈位，負責工程嘅Giem Sports公司更表示已經收到唔少電話查詢詳情，唔知啲「單位」會唔會引發搶購潮呢?