造福七百萬市民 呼籲周一鑊走人

///造福七百萬市民 呼籲周一鑊走人

造福七百萬市民 呼籲周一鑊走人

來源:東方日報   作者:    2012-04-19 15:50

雙非孕婦源源不絕來港產子,等於一次又一次鵲巢鳩佔,雖然話就話合法啫,不過唔合情又唔合理,而且導致中港矛盾尖銳化,被叫做蝗蟲嘅固然唔好受,叫人做蝗蟲嘅都有失風度。所以咯喎,候任特首梁振英為咗撥亂反正,保障本地媽媽權益,講到明私家醫院明年應該全面停收雙非孕婦,即使有人認為係架空現屆政府,仍然得到大量掌聲,包括平時聲大夾惡嘅泛民主派亦表示支持。

好嘞,功夫茶問問大家,一直對雙非問題坐視不理嘅食物及衞生局局長周一嶽,宣布配合梁振英提出嘅「雙非孕婦零配額」,八間公立醫院亦會明年起停收內地大肚婆,算唔算係跪低呢?正常人當然會覺得係啦,不過唔多正常嘅周局長話喎,自己膝頭有事,唔容易下跪。

周一鑊果然係周一鑊,孭咗鑊仲要死撐。根據佢嘅講法,兩星期前已經主動聯絡梁振英,討論雙非孕婦配額問題,同私家醫院討論嘅時候,亦表明下屆政府有自己嘅決定,私家醫院應該有心理準備,講到雙非「零配額」好似係佢嘅功勞咁。

唉,算吧啦,係唔係跪低都係次要,重要嘅係膝頭有事即係腳痛,周一鑊點解唔學董建華以腳痛為由鞠躬落台呢?你知啦,雙非孕婦問題困擾咗香港人咁耐,罪魁禍首就係呢一位無腰骨、無膊頭又無膝頭嘅「三無局長」,腳痛落台為公為私都唔係壞事。

講真吖,萬一唔知點解周一鑊竟然留任至下屆政府,香港人嘅生老病死全部出現危機。生老病姑且唔講住,喂,身為香港人你敢死咩?除咗雙非孕婦問題遲遲未解決,周一鑊另一個負責嘅範疇同樣長年累月交唔出功課,就係骨灰龕位嚴重短缺嘞。喺咁嘅情況之下,平民百姓真係唔敢死囉,個個鬥長命希望有朝一日等到有機會「陰宅上樓」。

計功夫茶話齋,下跪唔係乜嘢特別羞恥嘅事,如果願望可以由於雙膝着地而成真,相信好多香港人唔介意跪一跪。乜嘢願望呀?點解要跪呢?即係咁,功夫茶呼籲大家集體跪求周一鑊執包袱,面向西邊告老歸田,千祈唔好再阻住地球轉!

你想生仔冇咁痛苦咩?跪求周一鑊走人啦。你想老來唔會無依咩?跪求周一鑊速閃啦。你想患病唔會失救咩?跪求周一鑊消失啦。為咗全港市民生老病死嘅幸福着想,跪就跪,冇問題,最緊要庸官消失,咁就一天都光晒。

嗱嗱嗱,反正梁振英嘅施政作風同周一鑊南轅北轍,自動自覺人間蒸發咪唔會冇面囉,而且辭官歸故里實在造福七百萬人,點都叫做臨尾積陰德吖!

By |2018-09-13T12:02:43+00:00四月 19th, 2012|最新新聞, 最新消息|0 Comments