金字塔學通識課

///金字塔學通識課

金字塔學通識課

來源:am730   作者:陶傑    2012-01-18 11:40

圖:安放在水晶棺中的金正日遺體。(資料圖)

北韓偉大領袖正日金總不幸逝世,東亞同悲,尤其係祖國人民,由於同北韓有鮮血凝固之友誼,北韓人在街頭呼天搶地,炎黃子孫亦感到傷痛。

北韓係和諧國家之典範,好多事都開世界風氣,正日同志仙遊,孝子正恩繼位,就依照習俗將爹哋副遺體永久保存,放在水晶棺,任人瞻仰。

保存屍骸,此一動作,令香港有何啟示?緊係有啦。現在香港七百萬人,死咗只有兩種處理方式:有錢嘅就在大鵬灣將軍澳對面,搵個風水墓穴隆重土葬。冇錢嘅就去歌連臣角一把火燒咗佢,剩下骨灰手尾,仲要四圍搵個骨灰龕擺放,一係就倒落維多利亞港。

但係若果特別有錢,又點樣可以顯彰生前風光無上之社會地位呢?學北韓處置正日遺體同埋祖國供奉毛主席咁,將條屍永久醃製,成為水晶棺內萬人瞻仰之物體,不失為一種方法。

但凡香港政界名流,若然想名流青史,將來蒙主寵召,埋喺地底或者化為飛灰,冇公眾可以瞻仰,又點可以延續一分功業。所以不妨向北韓或祖國重金禮聘一隊遺體永久保存之醫療工程師,在遺囑上講明,將來魂歸天國之後,將遺體永久保存,並且斥巨資購買一幅土地,連埋副水晶棺公開擺放,令香港人世世代代可以排隊參觀,除咗緬懷名人生前對香港之貢獻,亦可以近距離研究屍體之保存方法,防腐工作做得靚唔靚,D面色係黃嗰頭定係白裡透血,中小學生物及自然科學教師,更可以帶同學生作臨場通識教育,指指點點,講埋埃及金字塔木乃伊之歷史,增長學生見聞,又可以推廣課外學習之趣味。

所以正日金總之逝世,除咗係一個好不幸之消息,不幸中之大幸,就係永久保存遺體,為香港有錢有面之人,帶來重要的靈感。遺體永久保存,若然當年李小龍有咁做,跟住放喺九龍塘之故居,特區政府同地產商,而家就唔敢郁。亡羊補牢,未為晚也,不妨而家開始啦。

By |2018-10-04T17:16:19+00:00一月 18th, 2012|殯葬文化, 生命文化|0 Comments