魯營起骨灰龕場發死人財

///魯營起骨灰龕場發死人財

魯營起骨灰龕場發死人財

來源:太陽報   作者:    2011-11-12 11:52

德國漢堡公墓(資料圖)

巴塞隆拿大發死人財!「地上最強」球場內所向披靡,場外搵錢亦相當有計,繼推出魯營婚禮套餐後,日前再宣布開設魯營骨灰龕場,而且號稱係全世界最大嘅足球龕場。巴塞更以旗下球星都會「長眠」此地作為賣點,吸引死忠Fans買位同偶像「同居」,他日沙維、美斯等百年歸老,隨時做埋「巴塞魂」!

魯營球場上年推出婚禮套餐大受歡迎,其實更早時候已諗住搞骨灰龕場,只不過拉波塔反對先擱置。依家羅素爾揸旗,巴塞日前就宣布會喺魯營興建可以安放2萬個骨灰龕嘅龕場,雖然佢哋唔係第一隊咁做,英超、德甲、阿甲同巴甲都有呢項服務,就連西甲嘅馬體會同愛斯賓奴都先過巴塞搞,不過魯營骨灰龕場仍然最為矚目。

2萬個龕位全球最大

馬體會嘅龕場只可以容納4,210個骨灰龕,巴塞2萬個龕位嘅容量差唔多係佢哋5倍,而且號稱係世界球壇最大規模嘅一個。據報巴塞為咗令到場面唔好咁悲涼,計劃喺牆上面髹上巴塞球員踢波雄風,喺計劃啟動儀式入面,巴塞仲宣布球會嘅職員、球員過身後,都可以將骨灰放喺呢度,實行做到生係巴塞人、死係巴塞魂!

當然,巴塞起呢個骨灰龕場最緊要都係搵錢,球會將接受全球巴塞Fans預訂,雖然收費未有公布,但以馬體會龕場收費1,200歐元至4,000歐元(約42,500港元)嘅標準,巴塞收費應會更高,愛斯賓奴就預計骨灰龕場會為佢哋帶嚟450萬歐元(約4,780萬港元)收入。西班牙傳媒透露,當地人對殯葬睇法變咗,有24%嘅人傾向用火化,所以骨灰龕需求大增,而且西班牙舉行葬禮平均使費係2,000歐元至3,000歐元,幫襯心愛嘅球會都係唔錯嘅選擇。

球會殯葬服務到處都有

小保加墓園(阿根廷)

‧坐落响布宜諾斯艾利斯60公里外,一共有3,000塊墓地,其中300塊留畀啲球員同職員,每塊地售價500至900美元,鍾意嘅話仲可以買埋個小保加專色藍黃棺材,加起嚟都平過啲歐洲球會。

漢堡公墓(德國)

‧06年7月下旬落成,距離漢堡個主場正門只係15米,專供擁躉使用,但係規模比較細,只能夠提供500塊墓地,肯定唔夠班Fans用,而且價錢好貴,單人墓地盛惠8,000歐元,雙人就12,500歐元,骨灰龕2,500歐元,仲只能放25年,期滿後或者要搬竇。

阿仙奴、愛華頓(英格蘭)

‧英格蘭球迷向來狂熱,愛華頓喺大約5年前已為球迷提供「死後服務」;阿仙奴嘅舊主場高貝利改建成高級住宅後,亦喺花園劃出紀念區,畀500個死忠球迷安放骨灰。

By |2018-09-18T12:12:38+00:00十一月 12th, 2011|最新新聞, 最新消息|0 Comments