來源：明報 作者: 2010-07-13 10:43
政府上星期公布骨灰龕政策諮詢文件，講明每區都要起骨灰龕，仲要無得永久安放，引起嘅地區爭議真係唔講得笑，食物及衛生局長周一嶽同副手梁卓偉都唔敢掉以輕心，親自落區打民心牌，周局長星期四仲約齊18區區議會主席見面，親自解釋政策路線圖，希望各區多多支持喎。
約齊18區會主席解畫
睇番上次周一嶽要約齊全港區議會正副主席會面，原來係舊年4月30日講疫症，當時大家都好擔心新型流感會變成全球大疫症，周局長仲話係咪變種佢都唔敢包，隨時死傷無數，希望區議會幫幫手，動員社區力量，共同抗疫咁話，當然得到大力支持啦。
但係，講到起骨灰龕，各區係咪一樣舉腳支持，Emily真係唔敢講，有政府官員之前喺記者放風會都話，要市民接納唔係易事，但就「唔可以原地踏步……」記者聽聽吓，覺得呢句話似曾相識，咪係「起錨」廣告囉，可能周局長都要拎返個「起錨」襟章出嚟，同各區區議會力銷﹕「骨灰龕，要起錨喇!」